Mumbai, Mei 15, 2020 - Ubalozi wa Tanzania nchini India, kwa kushirikiana na Shirika la Ndege la Tanzania [Air Tanzania] pamoja na Diaspora wa Tanzania nchini India wamefanikisha safari ya kwanza ya kuwarejesha nchini watanzania waliokuwa wamekwama katika miji mbalimbali nchini India kutokana na zuio la kuingia na kutoka ndege za Kimataifa lililowekwa na Serikali ya India kama hatua mojawapo ya kudhibiti kuenea kwa maambukizi ya ugonjwa wa COVID-19.

 

Ndege maalum ya Boeng 787-8 ya Dreamliner ya Air Tanzania ilitumwa na Serikali Jijini Mumbai kuja kuwachukua watanzania hao waliokwama nchini India tangu tarehe 22 Machi 2020 lilipowekwa zuio hilo na Serikali ya India. Ndege hiyo imeondoka leo tarehe 15 Mei 2020 saa 2 asubuhi katika Uwanja wa Ndege wa Kimataifa wa  Chhatrapati Shivaji International Airport, Mumbai ikiwa imebeba jumla ya raia wa Tanzania 246, miongoni mwao ni waliokuwa wamekuja India kwa ajili ya matibabu; wahitimu kutoka vyuo mbali mbali na wanafunzi ambao wanalazimika kurudi nyumbani kwa kuwa vyuo vimefungwa hadi mwezi Agosti/Septemba 2020.

 

Ndege hiyo inatarajiwa kuwasili katika Uwanja wa Ndege wa Kimataifa wa Julius Nyerere [JNIA] mnamo saa 6 mchana leo Ijumaa tarehe 15 Mei 2020. Takriban watanzania 410 walijiandikisha katika Ubalozi wa Tanzania, New Delhi  na kuelezea utayari wao wa kuchangia gharama.

Kwa kuwa idadi ya watanzania waliojitokeza ilikuwa kubwa zaidi ya waliweza kusafiri katika awamu hii ya kwanza, Serikali inaangalia uwezekano wa kutuma ndege nyingine maalum ya Air Tanzania kuja kuwachukua raia waliosalia ndani ya mwezi huu. Gharama ya tiketi ya ndege hiyo, namna ya kulipa, Mahali ambapo ndege itatua pamoja na tarehe za kuwasili kwa ndege hiyo nchini India zitatangazwa na Ubalozi mapema iwezekanavyo.

Ubalozi unapenda kuwashukuru Diaspora wa Tanzania nchini India kwa kufanikisha zoezi hili kwa weledi mkubwa na Uongozi wa Wizara za Mambo ya Nje za India na Tanzania na Serikali, kwa ujumla, kwa miongozo mbalimbali wakati wa zoezi hili.